Et Oost-Vlaams (in et dialekt zels: Oast-Vloams) is een groep dialekten die in de Belgische perveensie Oost-Vlaanderen spreuken wodden. De tael wodt ok spreuken in et oostelike diel van Zeeuws-Vlaanderen in de perveensie Zeelaand, en ok in een stroke in et oosten van West-Vlaanderen. Et beheurt tot de Nederfrankische taelgroep en vormt een dialektkontinuüm mit et West-Vlaams en et Braobaans. Pattie luden zien et hiele Oost-Vlaams as een overgaang tussen West-Vlaams en Braobaans. Ok taelkundig wodt et soms, tegere mit West-, Fraans- en Zeeuws-Vlaams bi'j de Vlaamse groep rekend, soms bi'j de Braobaans-Oost-Vlaamse groep. De dialekten in et (noord)westen van Oost-Vlaanderen lieken soms slim op et West-Vlaams, die van de Denderstreke en et oosten van et Waaslaand bi'j et Braobaans.
Et Oost-Vlaams wodt spreuken rond de steden Aalst, Beveren, Deinze, Eeklo, Gent, Geraardsbargen, Hulst, Lokeren, Ninove, Oudenaarde, Sint-Niklaas, Wetteren en Zottegem.
Zoas alle Vlaamse streektaelen het ok et Oost-Vlaams vule invloeden van butenof had, onder aandere uut et Spaans, Fraans en et Duuts uut Oostenriek. Der bin aorig wat woorden uut et Frans in opneumen vanwege de verfraanste hoge kringen van Vlaanderen tiedens de 19e en vrogge 20e ieuw.
Taelhistorisch onderzeuk het antoond dat de Oost-Vlaamse dialekten tot in de 16e ieuw vule kenmarken gemien hadden mit et West-Vlaams, mar dat die verwaantschop sund die tied stark verminderd is deur de invloed van et Braobaans.
In 2005 verscheen een etymologisch woordeboek van et Oost-Vlaams, schreven deur een West-Vlaamse dialektkenner.
© MMXXIII Rich X Search. We shall prevail. All rights reserved. Rich X Search